Подхватившие щит

А князь Володимер Андреевич, собрав воя многы около себе, и стояше ополчившеся близ Волока. И тамо неции татарове наехаша на нь; он же прогна их от себе. Они же прибегоша к Тактамышю царю пострашены и биты. Царь же, слышав, что князь великии на Костроме, а князь Володимер у Волока, поблюдашеся, чяя на себе наезда; того ради не много днии стояше у Москвы, но взем Москву, скоро отъиде. Царь же перевезеся за реку Оку и взять всю Разанскую землю, и огнем пожже, и люди посече, аполон поведе в орду множество безчисленное.

В лето 1385 месяца марта в 25, на Благовещанье святой Богородицы князь Олег Рязанскы взял град Коломну изгоном. Того же лета князь великии Дмитреи Иванович, сбрав соя многы, посла с ними брата своего князя Володимера Андреевичя на князя Олга и на Рязанскую землю. Тое же осени в Филипово говенье игумен Сергии, преподобныи старец, сам ездил на Рязань к великому князю Олгу о мире. Преже бо того мнози ездили к нему и не возмогоша утолити его. Преподобныи же старец кроткыми словесы и тихими речми и благоуветливыми глаголы, благодатию, вданною ему, много беседовал с ним о ползе души и о мире и о любви.

Князь же Олег преложи свирепство свое на кротость и покорися и уеротися и умилися велми душею, устыде бо ся толь свята мужа и взял с князем с великим мир вечныи.

В лето 1387 князь великии Дмитреи Иванович отда дщерь свою княжну Софью на Рязань за князя Феодора Олговича. Тое же зимы того же мясоеда бысть розмирие князю великому Дмитрию Ивановичу с князем Володимером Андреевичем; поимани быша бояре стареишии княжи Володимеровы и розведени быша вси по городом, и седеша в нятьи.

Тое же весны месяца марта в 25, в честныи праздник Благовещениа святыя Богородица, князь великий Дмитреи Иванович взя мир и прощение и любовь с князем с Володимером Андреевичем.

В лето 1389 месяца маиа в 19, преставися благоверныи и христолюбивыи и благородныи князь великий Дмитрии Иванович Московскии. Того же лета месяца августа в 15 князь Василеи Дмитриевич седе на княжении на великом в граде в Володимери на столе отца своего и деда и прадеда, а посажен бысть царевым послом Шихматом.

Того же лета князю великому Василию Дмитриевичу бысть розмирие с князем с Володимером Андреевичем. Князь же Володимер с сыном своим с князем Иваном и с бояры стареишими поеха в свои град Серпохов и оттуду в Торжок, и тамо пребысть неколико время в Теребенском, дондеже умиришася.