Ром. На цыганском языке (диалект русска рома)

А вот адай мангэ посыкадыяпэ, со ещё прэ конэстэ… Дро ратя, кэдэ взрипирав лэс, лэскиро «честное комсомольское», то, хай, подджял ещё прэ конэстэ… сыр кэрэл вастэса, сыр рискирэл шэро…

Пал перегородка резко спучья:

– Прэ конэстэ? Прэ одола гадятэ? Прэ латэ, аи?

– Ту, Насте, пожалуйста, тихэс, а то сыр бы тыри хуланы на просутяпэ.

Ёв зря тревожился. Пхури хуланы на страдынэлас бессоницаса, а дадывэс кхины впечатлениёстыр. Засутя прэ пэрица дриван зоралэс, тэ розджянгавэс сыс нанэ просто. Ёй присыклыя, соб тэ старэл минутки ваш соибэ, со клиенты исы дро любо времё, требовательно дыкхнэ фарэнца дрэ фэнштра.

Нэ дадывэс сыс только екх пхурдыны, сави и прияндя клиентка. Пиро лачё дром бут машины традынэ мимо. Нанэ кэдэ шофероскэ тэ заджял. Эна и суты пэскэ, скицик камэс.

Сарэса нанэ ёй ушундя дасаво ракирибэ. Пал занавеска пасёлас нэви квартирантка, и дыкхэлас дро калыпэ.

– Мэ кокоро джинав, со дасаво не может тэ явэл. Но ёй же чяравэлас лэс пэскирэ тхудэса.

– И бутыр ничи на джинэс?

– Долэ времёстыр ничи на джинав.

Состыр же мэ лава тэ джинав?

– Нэ, дро лыл тэ спучес…

– Палсо лэн беспокоить? Ёнэ пэскирэ джиибнаса дживэн.

– Эна, сыр лакиро покоё ракхэс. А сави ёй, Будулаё, пэстыр?

– Кон?

– Адая гади…

– Ла кхарэн Клавдия.

– Адая Клавдия… гожо?

– Разве дрэ адава рэндо?

– А якха дасавэ же калэ, сыр Ванястэ, или савэ ваврэ?

– Сыр тукэ тэ пхэнав, Настя…

– Дякэ и пхэн, если на забистырдян.

Сыр странно и жутко манушэскэ, кэдэ дякэ эна ракирэн пал тутэ, сарэса пашыл.

Росчювэн пир кокальчики, а ту на можинэс и екх лав тэ пхэнэс. Пасёв, и шун, сыр пал тутэ пучен. Савэ тутэ якха… и на пхэнэса: «– Сера мандэ якха, сера! И заштылёв!».

– Нэ, тогда пхэн, сыр ёй… пир тыро, фэдыр мандыр, или нат?

– Тумэ, Настя, сарэса разна.

– Хитро ту, Будулаё. Если амэ разна, то ёй пэстыр русо, аи? Мэ г’ара дыкхав, со амарэ рома камэн бутыр прэ русонэндэ гадендэ тэ дыкхэн. И ту, Будулаё дасаво?

– Мангэ, Настя, ужэ поздно тэ дыкхав прэ гадендэ.

– Ада ту или хохавэс, или ракирэс прэ пэстэ.

– И тэ хохавав мангэ нанэ ваш со.

– Значит, ракирэс пэ пэс. Пэ миро некотора амарэ чавэ пхурыдыр тутыр. Скучно мангэ лэнца.

– Состыр? Тукэ, конечно, фэдыр тэ джинэс. Мэ, сыр ту кокори пхэндян, мануш адай нэво. Мэ не успел познакомиться. Нэ, мангэ посыкадыяпэ, со адай исы бут лаче чавэ.

– Лаче исы. Нэ только лэндэ нанэ дасаво, со сы тутэ.

– А со, пир тыро, исы мандэ?

– Опять ту саспэ. Ада мэ не могу тукэ объяснить.