Ҳаёт қайиғи (1 китоб)

Подшоҳларки, қуруқ қўл билан кетишган экан, юз минг (балки миллион ёки ундан кўп) долларини ташлаб кетувчи банда нолаю фиғон қилмаса ҳам бўлар, а?

Вақти-соати етганда у сизни кўриб титрагандир, йиғлагандир, буниси каминага қоронғи. Сиз бунақа ҳолатларга дуч келганингизда “Банда мендан қўрқиб, талвасага тушяпти”, деб ўйласангиз керак.

Банданинг дилидагини билгувчи, Самиййул алийм – ёлғиз Аллоҳдир! Ҳатто сиз ҳам буни билмайсиз. Биз эса тахмин қилувчи ожизларданмиз. Тахминимиз адаш чиқиб, сўзларимиз туҳмат тўрларига ўралган бўлса, тавбалар қиламиз – астағфируллоҳ! Ўша дўстимнинг қайнотаси кўзларидан оққан ёшларга доир тахминим шуки, у сизга жон топширишдан эмас, умр бўйи тўплагани бойлигининг қолиб кетаётганидан талвасага тушган бўлса эҳтимол.

Ким бу ерга келди, бир бино солди,

Ўзи жўнаб кетди, ўзгага қолди.

Бировлар қилса ҳам шунингдек ҳавас,

Р?морат битмади, етмади нафас.

    (Шайх Саъдийдан Ғафур Ғулом таржимаси)

Балки эшитгандирсиз, бир хотин умри адоғида йиғлаётган экан, уни “Ўлим – ҳақ, бу Аллоҳнинг иродаси, йиғламанг”, деб овутишса, у: “Ўлимдан қўрқаётганим йўқ, мендан кейин эримга ким тегиб оларкин, шунинг ташвишидаман”, деган экан.

Ҳаҳ, эзмалигим қурсин, касбим гап сотиш бўлгач, на чора? Сиз узоқ йиллар кутилган азиз меҳмонсиз. Меҳмонни ҳеч бўлмаса гап билан сийлай деяпман-да. Балки мендан баттар эзмаларни ҳам кўргандирсиз.