ҚАШҚАДАРЁ ТОМОНЛАРДА

ТУТАШМАС ЙЎЛЛАР

Дунёда йўллар кўп, сўқмоқлар яна,

Тармоқлаб кетгандир шаҳримда, ҳатто.

Манглай чизиқлари тақдир, анъна,

Кесишмайди сира амал, исботда.

Гўзалим, Барчинни эслатар жисминг,

Қаддингдан хижилдир сарви санубар.

Гавҳардир тиллодан узукка исминг,

Бош эгар Ширинлар учрашса агар.

Чарос кўзларингдан оҳу ҳавасда,

Товус ҳайрат қилар юрсанг хиромон.

Мушк-анбар таралар хушбўй нафасда,

Ялдо туни сочинг, ой юзинг тобон.

Сўзласанг лутфингдан чечак очилур,

Р?Р±РѕРґР°, адабда назокат беҳад.

Ҳилолнинг рашкидир юзингдаги нур,

Тобонлик баҳсидир муаммо жиҳат.

Сифатинг васфида қай бирин айтай,

Толмайди қаламим таърифда ҳеч ҳам.

Севиб қолармидим Фарходдек, нетай,

Кўрганим, билганим бўлганда мубҳам?

Ушалмас орзуйим, туташмас йўллар,

Сен юрар кўчангдир менга терс томон.

Умиддай туташса йўллар ҳам диллар,

Қалбдан ўчмагайдир таманно ҳамон.

БАҲС

Яхшилар кўп ёнда, тортмас эътибор,

Самимий бўлурлар салом-аликда.

Ёмонлар белгили, диққатинг ортар,

Ажралиб туради совуқ қилиқда.

Яхшилик кутамиз, одатда, дўстдан,

Кўнгиллар тўқлиги таниш-билишдан.

Ахир, дарахт қурир айрилса пўстдан,

Тўшак татимайди айро болишдан.

Р?шхона, чиқишар жўралар бўлар,

Бири опа, бири сингил, дугона.

Вақт келар, жамоа ҳайратда қолар,

Дўстлашган ёвлашар мисли бегона.