Православная энциклопедия

Икос 9

Ветия многовещанныя, яко рыбы безгласныя видим о Тебе, Богородице, недоумевают бо глаголати, еже како и Дева пребывавши, и родити возмогла еси; мы же, таинству дивящеся, верно вопием: Радуйся, премудрости Божия приятелище; радуйся, промышления его сокровище; радуйся, любомудрыя немудрыя являюща; радуйся, хитрословесныя безсловесныя обличающая; радуйся, яко обуяша лютии взыскателе; радуйся, яко увядоша баснотворцы; радуйся, афинейская плетения растерзающая; радуйся, рыбарския мрежи исполняющая; радуйся, из глубины неведения извлачающая; радуйся, многи в разуме просвещающая; радуйся, кораблю хотящих спастися; радуйся, пристанище житейских плаваний.

Кондак 10

Спасти хотя мир, иже всех Украситель к сему самообетован приде, и Пастырь сый Яко Бог, нас ради явися по нам человек: подобным бо подобное призвав, яко Бог слышит: аллилуйя.

Икос 10

Стена еси девам, Богородице Дево, и всем к Тебе прибегающим: ибо небесе и земли Творец устрои Тя, Пречистая, вселься во утробе Твоей, и вся приглашати Тебе научив: Радуйся, столпе девства; радуйся, дверь спасения; радуйся, начальнице смысленнаго назидания; радуся, подательнице Божественным благости; радуйся, Ты бо обновила еси зачатыя студно; радуйся, Ты бо наказала еси окраденныя умом; радуйся, тлителя смыслов упражняющая; радуйся, сеятеля чистоты рождшая; радуйся, чертоже безсеменнаго уневещения; радуйся, верных Господеви сочетавшая; радуйся, добрая медопитательнице девам; радуйся, невестокрасителънице душ святых.

Кондак 11

Пение всякое побеждается, сопростретися тщащееся ко множеству многих щедрот Твоих: равночисленныя бо песка песни аще приносим Ти, Царю Святый, ничтоже совершаем достойно, яже дал еси нам, Тебе вопиющим: аллилуйя.

Икос 11

Светоприемную свещу, сущим во тьме явльшуюся, зрим Святую Деву: невещественный бо вжигающи огнь, наставляет к разуму Божественному вся, зарею ум просвещающая, званием же почитаемая, сими: Радуйся, луче умнаго Солнца; радуйся, светило незаходимаго Света; радуйся, молние, души просвещающая; радуйся, яко гром, враги устрашающая; радуйся, яко многосветлое возсияваеши просвещение; радуйся, яко многотекущую источавши реку; радуйся, купели живописующая образ; радуйся, греховную отъемлющая скверну; радуйся, бане, омывающая совесть; радуйся, чаше, черплющая радость; радуйся, обоняние Христова благоухания; радуйся, животе тайнаго веселия.