Баппай берашта. Вахарах, цу вахаре керттера долчох лаьца. Михах лаьца а!

Баппай берашта. Вахарах, цу вахаре керттера долчох лаьца. Михах лаьца а!

Дика Кара

Ер дог тохадолийташ дола дувцар да даьй-ноаной шоай берашцарча безамах, ц1ен кхуврчарча й1овхалах, ц1ен-юкъе керттера долчох, вахаре нийслуча атта боацача хоржамах. Х1аранена довзаш долча, дега чу доаллача ц1еначох лаьца. Вахарахи рузкъан михахи лаьца, к1оарга ма1ан дола дувцар.

Баппай берашта

Вахарах, цу вахаре керттера долчох лаьца. Михах лаьца а!

Дика Кара

Перевод книги «Детям одуванчиков» (автор Дика Кара) с русского на ингушский язык

Переводчик Тамара Костоева

© Дика Кара, 2021

© Тамара Костоева, перевод, 2021

ISBN 978-5-0055-8240-9

Создано в интеллектуальной издательской системе Ridero

Садовш латтар.

Дийнахьа лаьтта й1овхал д1а а яьнна, сапарг1ата сайре хьат1аера. Дийна мел долча х1аман самукъадаьлар.

Баьцаш а оакхарий а дувша кийчлуш дар. Мозий ц1оз, массаза санна, арадаьлар ший балха. Х1аьта къаьнача баппас къамаьл де лаьрх1ар ший ви1ий берашца – баппилгашца.

– Хьалхарча баппаша оалаш дар: сага вахаре керттерадар – бокъо хилар да шийна ловча оаг1орахьара боаг1ача михаца д1аваха. Керттерадар – уллув даи нанеи хилар да.

Баппилгаш цецъяьнна шоайла б1арахьажар.

– Дада, даи нанеи уллув хилар керттера х1анад? – хаьттар цхьан баппилго.

– Доккха хилча кхетаргда шо, – аьлар даь-дас.

«Кхетадиц х1анз а, з1амига ба», – аьнна хийттар къаьнача баппайна, т1аккха аьлар: «1одувша! Ха яхай».

З1амигача баппилга керта чу латтар воккхача сага аьннар, цунах уйла еш, тхьовсалацар из:

– Дада, хьадувцал, хьадувцал хьайна 1айха дийцар! Фу яхилга да из? Хьадувцал хьайна из хьаькъале къамаьл!

– Хьаькъале дий-те из? – аьлар баппас, ше-шийца оалаш санна, б1арг хьа а ца белаш.

– Хьадувций 1а? – сацацар баппилг.

– Диканд. Ладувг1алахь, – аьнна, сих а ца луш, волавелар воккха саг.

Цхьан хозача баь т1а яхаш хиннай баппаш. Уж догц1ена кхолламаш, шоашта ц1ена фо а долаш,, мел эша наьна-маьлха й1овхал а йолаш яхаш хиннай.

Тушол-бетта, лоа дашашехь хьалъара а яьнна лаьтта к1алхара, шоашта мерза дуне дуаш яр уж. Уж хоза хеташ, царна б1арахьежар оакхарий, оалхазараш, юхег1олла т1ех мел воалар.

Озаенна маьлхага кхача г1ерташ санна латтар уж, дерригача дуненга елаенна, вахара раьза йолаш, даьла денна г1адъяха йолаш. Х1ара 1уйранна малха духьала айлора уж, шоай безаме йовхьамаш цунга аййора цар.