Яңа гасыр тавышы / Голос нового века (на татарском языке)

Бу көннәрнең бизәк булып

күңелдә калырлыгы…

Көзләрнең матурлыгы да,

җәйләрнең сабырлыгы…

«Шулкадәр тын ага елгалар…»

Шулкадәр тын ага елгалар,

елгалар шулкадәр тын ага.

«Су үргә акмас» дип җырларлар,

тыңлама беркемне, тыңлама.

Кышларның төннәре бик озын,

сабырың беткәндә кышларда,

«Бу елны яз килми» диярләр,

ышанма ул сүзгә, ышанма.

Шулкадәр тын ага елгалар.

Бардыр ла үрләргә акканы.

Язларсыз ел булмас. Таңнарның

юктыр ул кояшсыз атканы.

Ялгышып өметсез сүзләрен

кемнәрдер теләсә әйтергә,

тыңлама беркемне.

Аллаһның рәхмәтен хәтерлә.

Бүре баласы

1.

Кышкы төннең зәһәр салкыннары.

Ап-ак кына урман юллары.

Р?шетелде урман эчләрендә

бүре баласының улавы.

Ул адашкан иде урманында,

кайтыр юлын мең кат эзләде.

Кар өстендә

серле юллар булып

сузылып калды бүре эзләре.

Үз юлларын йолдызларга карап,

айга карап таба юлсызлар.

Ләкин бүген бар да тып-тын иде,

сүз дәшмиләр иде йолдызлар.

Бик еракта әнә авыл балкый,

йортларында кояш-ут яна.

Барыр иде —

бара алмый гына,

бүре булып тугач дөньяга.

Үз хәлен ул ничек аңлатыр соң,

бүре телен белми авыллар…

Туңар инде.

Яз җитүгә аны

кар астыннан табып алырлар.

2.