Помощь небесных покровителей. Полный сборник молитв на каждый день года (молитвы общие)

Святых отец неделя пред Рождеством Христовым

Тропарь святых отец, глас 2

Велия веры исправления, во источнице пламене, яко на воде упокоения, святии трие, отроцы радовахуся, и пророк Даниил львом пастырь, яко овцам, являшеся. Тех молитвами, Христе Боже, спаси души наша.

Аще вне 20-го числа Кондак отцев, глас 6

Рукописаннаго образа не почетше, но Неописанным Существом защитившеся, треблаженнии, в подвизе огня прославистеся; среде же пламене нестерпимаго стояще, Бога призвасте: ускори, о Щедрый, и потщися, яко Милостив, в помощь нашу, яко можеши хотяй.

Аще же внутрь предпразднства Кондак, глас 1

Веселися, Вифлееме, Евфрафо, готовися: се бо Агница, Пастыря великаго во утробе носящи, еже родити тщится, Егоже зряще, Богоноснии отцы веселятся, с пастырьми поюще Деву доящую.

Праведных Иосифа Обручника, Давида царя и Иакова, брата Господня по плоти

неделя по Рождестве Христовом

Молитва праведному Иосифу, Обручнику Пресвятой Богородицы

из акафиста

О святый праведный Иосифе! Ты еще на земли сый, велие имел еси дерзновение к Сыну Божию, Иже благоизволи именовати тя отцем Своим, яко обрученика Своея Матере, и послушати тя; веруем, яко ныне с лики праведных во обителех небесных водворяяся, услышан будеши во всяком твоем прошении к Богу и Спасителю нашему. Темже, ко твоему покрову и заступлению прибегающе, смиренно молим тя: якоже сам от бури сомнительных помышлений избавлен был еси, сице избави и нас, волнами смущений и страстей обуреваемых; якоже ограждал еси Всенепорочную Деву от клеветы человеческия, огради и нас такожде от всякия клеветы напрасныя; якоже хранил еси от всякаго вреда и озлобления Воплотившагося Господа, сице сохраняй твоим заступлением Церковь Его Православную и всех нас от всякаго озлобления и вреда. Веси, святче Божий, яко и Сын Божий во днех плоти Своея в телесных потребах нужду имеяше, и ты послужил еси им; того ради молим тя, и нашим временным нуждам благопоспеши твоим ходатайством, подая нам вся благая, в житии сем потребная. Изряднее же просим тя, исходатайствуй нам оставление грехов прияти от нареченнаго ти Сына, Единороднаго же Сына Божия, Господа нашего Иисуса Христа, и достойны быти наследия Царства Небеснаго нас предстательством твоим сотвори, да и мы, в горних селениих с тобою водворяющеся, прославим Единаго Триипостаснаго Бога, Отца и Сына и Святаго Духа, ныне и во веки веков. Аминь.